蒙古國前傳 - 國產黑漆漆 From Beijing with Luck （上）
長途巴士被太陽暴曬後，車內氣溫可能高達 40 度，所以未開車呍所有人都喺巴士外面透涼
｜上文提要｜ 內蒙古 (中國) 嘅外圍係外蒙古 (蒙古國) 嘅內圍
話說我哋坐上咗一架令我又愛又恨嘅黑巴，最後錯失當日入夜前最後一班由邊境扎門烏德開往首都烏蘭巴托嘅通宵火車。好好彩每次都有熱心蒙古國女士出手相助，為我哋一一化解，帶嚟接二連三有驚無險嘅難忘經歷。
由紅磡出發嘅京九鐵路
上年六月我哋由紅磡火車站出發，坐通宵火車去北京，再去長途巴士站坐通宵巴士去蒙古國扎門烏德。其實有唔少背包客都會用呢個方法，雖然要花較多時間，但係最平心最有經歷。之前上網睇過佢哋嘅分享，雖然唔及火車快捷方便，但用火車飛嘅五分一價錢喺坐巴士，上面有床位俾你瞓覺過夜都算係另類經歷。我抱住而家唔試遲啲老咗想試都唔會試嘅心態，最後選擇長途過境巴士。
北京木樨園長途汽車站
炎炎夏日嘅北京氣溫大約有 35 度，長途巴士被太陽曬熱後車內氣溫可能高達 40 度，所以未開車之前所有人都喺巴士出面透涼。巴士分兩層，樓上全部都係坐位，樓下放大型行李，同我哋上網見到有床位嘅巴士唔同，開始起疑心。
之後我去問司機點解我上網見到有床位嘅巴士同呢架唔同？佢話因為消防同安全理由，嗰款車已經慢慢被淘汰，算你講得啱，安全最重要。巴士大約有十零人，三分一都坐唔滿就開車。我估同車嘅都係內蒙為主嘅中國人，個個都係大包大箱行李貨物。
炎炎夏日嘅北京氣溫大約有 35 度
旅遊巴總算成功開出，即刻攞盒上車前買嘅朱古力百力滋出嚟慶祝，一開先發覺啲朱古力熱到溶曬。架車行咗冇幾耐就停咗喺一個商場嘅停車場，唔知發生乜事之後仲閂埋冷氣，忍咗五分鐘都冇起色，唯有落車睇睇。
旁邊停咗另外一架新淨啲同上層有床位嘅巴士，原來佢哋搵緊啲貨上我哋架巴士，個樣鬼鬼祟祟，好有可疑。我又行去問司機發生咩事，佢淨係話冇咁快開車，叫我哋透吓涼去吓廁所先。慢慢仲有其他人開始上我哋架巴士，我哋梗係企喺度邊度都唔去，睇下發生乜事。
巴士成功開出長途汽車站
旁邊停咗另一架有床位嘅巴士，些人鬼鬼崇崇
一等就等咗兩個鐘，我哋見佢好似就快開車就行返上去個位度，點知原本放咗背囊嘅位都俾人移開咗，仲坐住兩個大媽。一秒被辣㷫嘅我哋即刻用盡方法表達個位本身喺我哋嘅，最後成功爭取我哋嘅位置。點知轉個頭有第一批上車嘅人攞住張車飛，用英文同我哋講個位係佢哋，(第二批上車嘅人冇座位編號，見位就坐，見到唔係屬於自己嘅嘢就會清開，十分霸道)。而本身我哋車飛嘅座位喺車頭，空間好窄。因為座位後面就係樓梯所以座位冇得仰後，而家仲要唔知俾邊個放滿曬嘢，比些貨同袋坐住。
再一次瞬間被辣㷫嘅我哋刻衝落去搵司機，同佢講我哋個位有問題要轉另一個連位。不過有好多個霸道嘅大媽一人霸兩個位，搞到冇曬連位 (自己坐一個，個袋坐一個，對腳伸長令你根本行唔到入去)，最後要司機幫手擺平我哋先有一對連位坐，不過好有可能佢哋都係同黨。
大媽式坐大巴
辣到㷫曬嘅我哋決定，一定要將呢件事紀錄落嚟，至少可以話俾我哋身邊嘅人聽唔好再中伏。喺冇任何人交代，無端端俾人車咗去神秘地方運人運貨，擾攘咗三個鐘頭旅遊巴終於再次開動，離開呢一個疑似從事非法活動嘅鬼地方 - 「欣雅汇生活广场」停車場一角陰暗處。我有理由相信我哋坐上咗一架經改裝偷運黑貨嘅黑巴。
巴士由木墀園長途汽車站駛到欣雅汇生活广场
巴士喺停車場嘅一角混人混貨真係混帳
從遠處回望停車場陰暗嘅一角，被強制停留兩個鐘
萬里長城長又長，冇諗過我哋會途經其中一段。巴士為每個人準備咗大毛氈，相信入夜之後會轉冷。我哋在北京市內遇上大塞車，冇幾耐我哋就瞓著咗。
巴士會經過萬里長城
飯店感覺尚算光猛乾淨，至少我哋食完都冇肚痛。我叫咗一個好難整得唔好食嘅茄蛋飯 (柿子雞蛋飯)，佢果然冇令我失望，印像中係幾好食。
大約逗留半個鐘，同車嘅人都紛紛離開。我哋都跟大隊爬多兩啖飯，去完厠所就想上番車。
一排車都差唔多樣，要影底個車牌唔好上錯車
入夜之後巴士靠站p一間飯店外，所有人都落車自費食飯去廁所。旁邊有好多㗎差唔多樣嘅旅遊巴，真係要影幅相認住車牌唔好上錯車。
長途巴士必經飯堂，四餸一湯人民幣 25
手寫單，可能之後有一段時間都見唔到中文字
一上到車大媽們不約而同護膚搽 cream，然後就伸長雙腳進入睡眠狀態。食飽飯冇嘢做嘅我除咗冇搽 cream 都好快同佢哋一齊進入睡眠狀態。
半夜扎醒發現旅遊巴窗外耐唔時遠處有點光，之後越來越強，然後又慢慢消失，感覺有點奇異。定一定神先發覺原來旅遊巴停咗喺公路旁邊，感覺冇危險就繼續瞓覺。
半夜扎醒望出窗外，耐唔時遠處有點光，然後又慢慢消失
第二朝我地嚟到中國內蒙北部一個叫二連浩特嘅城市，佢係陸路進入蒙古國嘅海關口岸，旅遊巴停咗喺一間叫「布宣蒙餐」嘅食店食免費早餐。不過一落車即刻醒曬，因為比起尋日喺北京上車足足跌咗廿度。
每人都有一份炒飯同熱嘅鹹奶茶，食完早餐又排隊去廁所。之後再上返旅遊巴去市區然後放低我哋四、五個鐘，喺下午時候接返我哋，然後正式過關進入蒙古國。
比起尋日喺北京上車足足跌咗廿度
每人都有一份免費炒飯同熱嘅鹹奶茶
二連浩特最出名嘅係發掘到恐龍同恐龍蛋化石，係一個世界聞名嘅恐龍之鄉，唔知佢同金槍人仲有國產零零漆有冇關係。我哋步行漫遊二連浩特，行過恐龍大街大媽跳舞大廣場；去過淨係得一條恐龍雕像嘅恐龍公園；見過國際知名連英國名牌「新 Balance」 涉嫌抄襲嘅中國二次創作運動品牌「紐 Barlun」 實體專門店。今日可以舉頭望明牌，一見國貨運動鞋，真係有驚冇喜。
最遺憾係入唔到當地嘅超級市場，佢哋一定要你放好背囊或隨身物品入門口嘅儲物櫃先可以入去。但我哋個背囊太大根本放唔到入去儲物櫃，所以只能擦身而過。
紐巴伦 NEW BARLUN 實體專門店
旅遊巴冇喺原定時間過嚟接我哋，同車嘅人捉緊過關前最後入貨機會，又多咗幾箱戰利品。遲咗足足三十分鐘，終於有架七人車出現，分批超載接送。我哋十個人逼係同一架車，聽住強勁嘅蒙古音樂，準備經歷喺中國人面前冇嘢係冇可能嘅非常黑暗時刻。